Германскиот министер за одбрана Борис Писториус изјави дека се разгледуваат мерки со кои би се спречило крајнодесничарската партија Алтернатива за Германија (АфД) да добие пристап до доверливи државни информации доколку во иднина стане дел од власта.
Во интервју за германскиот весник „Билд“, Писториус рече дека ваквиот став се темели на, како што оцени, блиските врски на АфД со Русија и рускиот претседател Владимир Путин.
„Интензивно го разгледуваме прашањето кому може да му биде дозволен пристап до доверливи информации. Тоа е наша обврска бидејќи станува збор за безбедноста на државата“, изјави министерот.
АфД, која во моментов е најголема опозициска партија во Германија, во неколку сојузни покраини е предмет на истраги од домашните разузнавачки служби поради нејзините екстремистички и антиимиграциски ставови.
Сите водечки германски политички партии и натаму одбиваат каква било соработка со АфД, придржувајќи се до таканаречениот „заштитен ѕид“ кон крајната десница. Канцеларот Фридрих Мерц повеќепати нагласи дека нема да влезе во коалиција со оваа партија.
Во септември годинава во покраините Саксонија-Анхалт и Мекленбург-Предна Померанија ќе се одржат регионални избори, на кои АфД се надева дека ќе освои мнозинство и за првпат ќе формира покраинска влада.
