Претседателот на СДСМ, Венко Филипче, на денешната прес-конференција побара министерот за здравство и, како што рече, сите надлежни институции да понесат политичка и кривична одговорност поради случајот со загадената вода во Гостивар, оценувајќи дека со своето непостапување го довеле во ризик здравјето на граѓаните.
На денешната прес-конференција, Филипче изјави дека загадувањето на водата започнало кон крајот на јуни, а институциите, според него, не реагирале навреме.
„Загадувањето на водата започнало уште на крајот на јуни. И никој не реагирал. Никој ништо не кажал. Ги оставиле луѓето во Гостивар да пијат загадена вода. Институциите со недели молчеле. Не само што молчеле, туку ја прогласиле водата за питка, дека можела да се пие“, рече Филипче.
Тој оцени дека контролните механизми не функционирале и побара Основното јавно обвинителство да отвори постапка по допрен глас.
Според Филипче, додека институциите и обвинителството не презеле соодветни чекори, состојбата се влошувала, при што, како што наведе, околу 3.000 луѓе биле затруени.
„Сите коишто учествувале во прикривање на овие информации мора да сносат и политичка и кривична одговорност – министерот за здравство, директорката на Институтот за јавно здравје, Центарот за јавно здравје, Агенцијата за храна и ветеринарство и обвинителството. Бараме политичка одговорност и оставки од овие луѓе“, изјави Филипче.
Тој додаде дека, според ставот на СДСМ, случајот со Гостивар не е изолиран инцидент, туку показател за нефункционирање на институциите и лошо управување со системот од страна на актуелната власт предводена од ВМРО-ДПМНЕ.
