Министерството за правда гледа напредок во судството, Европската комисија предупредува на политички влијанија и недостиг од кадар

Министерството за правда ги истакна позитивните оценки од најновиот извештај на Европската комисија за 2026 година, оценувајќи дека Брисел го препознал напредокот во правосудните реформи. Сепак, во истиот извештај Европската комисија предупредува дека независноста и финансиската автономија на судството и понатаму се поткопуваат од мешање на други гранки на власта и од сериозниот недостиг на финансиски средства и кадар.

Во соопштението на Министерството се нагласува дека Европската комисија нотирала позитивни достигнувања во унапредувањето на законската и институционалната рамка во согласност со европските стандарди.

Како позначајни резултати се наведуваат напредокот во спроведувањето на Стратегијата за реформа на правосудството 2024–2028, донесувањето на новиот Закон за Судскиот совет, кој во голема мера ги адресира препораките на Венецијанската комисија, како и новиот Закон за Советот на јавните обвинители.

— реклама —

Министерството ги издвојува и законите за платите на судиите и јавните обвинители, новиот Закон за парничната постапка и напредокот во подготовката на Патоказот за владеење на правото.

Според Министерството, овие оценки претставуваат потврда за постигнатите резултати, но и дополнителна обврска за продолжување на реформите.

Меѓутоа, целосната оценка на Европската комисија за функционирањето на судството е посложена. Во извештајот се наведува дека Македонија има одредено до умерено ниво на подготвеност во оваа област и дека е постигнат одреден напредок.

— реклама —

И покрај донесените закони, Брисел предупредува дека постојаното мешање на други гранки на власта, како и драстичниот недостиг на финансиски и човечки ресурси, ја поткопуваат независноста и финансиската автономија на судството.

Дополнително, Европската комисија оценува дека Македонија не постигнала напредок во спречувањето и борбата против корупцијата, која останува широко распространета и претставува сериозна причина за загриженост.

— реклама —

Особено се посочува дека предметите за корупција на високо ниво продолжуваат да се одолговлекуваат и често застаруваат, што придонесува за перцепцијата на неказнивост.

Овие критики не се опфатени во соопштението на Министерството за правда, кое се фокусира на законските и институционалните достигнувања.

Од Министерството, сепак, нагласуваат дека вистинскиот успех на реформите не се мери само преку донесените закони, туку и преку нивното влијание врз функционирањето на институциите и остварувањето на правата на граѓаните.

— реклама —

Во наредниот период, како што најавуваат, посебно внимание ќе биде посветено на доследната примена на законските решенија и исполнувањето на препораките на Европската комисија.

Министерството посочува дека целта останува изградба на независен, професионален, транспарентен и ефикасен правосуден систем, во кој законот важи подеднакво за сите.

Извештајот на Европската комисија покажува дека, иако е постигнат напредок во донесувањето закони и поставувањето на реформската рамка, останува предизвикот тие промени да обезбедат вистинска независност на судството и поефикасна борба против корупцијата.