Министерството за здравство соопшти дека е забележано почетно намалување на бројот на новопрегледани пациенти со симптоми на гастроентероколит во Гостивар, додека надлежните институции и понатаму внимателно ја следат состојбата на терен.
Според податоците од Општата болница и Здравствениот дом во Гостивар, во текот на вчерашниот ден биле евидентирани 564 новопрегледани пациенти, што е помалку во споредба со претходниот ден, кога биле регистрирани 649 пациенти и бил достигнат дневниот максимум.
Досега во Општата болница Гостивар се евидентирани вкупно 1.554 пациенти, а во Здравствениот дом 1.392. Четирите лица кои беа хоспитализирани, се пуштени на домашно лекување.
Од Министерството информираат дека досега се поднесени 140 формални пријави, кои ги обработуваат епидемиолошките тимови на Центарот за јавно здравје – Тетово и Институтот за јавно здравје. Во рамки на активностите се спроведени и 81 епидемиолошка анкета.
Надлежните посочуваат дека кај најголемиот дел од пациентите клиничката слика е лесна и дека продолжуваат сите неопходни епидемиолошки, лабораториски и превентивни мерки.
Министерството за здравство апелира граѓаните да ги почитуваат препораките за одржување лична хигиена, а при појава на повраќање, дијареја, покачена телесна температура или знаци на дехидратација, навремено да побараат лекарска помош.
