Состојбата со епидемијата во Гостивар е стабилна, иако е регистрирано дневно зголемување на бројот на први прегледи, соопшти Министерството за здравство.
Според податоците, на 31 јули биле евидентирани 60 први прегледи, што, како што посочуваат од Министерството, е значително помалку во споредба со 18 јули, кога бил достигнат пикот со 649 прегледи.
Од 14 до 31 јули се регистрирани вкупно 4.543 први прегледи. Во истиот период се примени 1.028 формални пријави за заразна болест, а изработени се 730 нови епидемиолошки анкети, со опфат од 71 процент.
Во однос на западнонилската треска, од Министерството информираат дека до Институтот за јавно здравје нема новопријавени лабораториски потврдени случаи.
На Клиниката за инфективни болести се хоспитализирани тројца пациенти кај кои постои сомнение за заболувањето, а се очекуваат резултатите од лабораториските анализи.
Министерството за здравство соопшти дека во координација со Институтот за јавно здравје и здравствените установи продолжува со засилен епидемиолошки надзор и најави дека јавноста навремено ќе биде информирана за сите нови сознанија.
