Митрески: Власта удри по наставниците, ама не се откажува од своите луксузи и привилегии

Пратеникот на СДСМ, Јован Митрески, во собраниската расправа за измените на законите за основното и средното образование предупреди дека најавената оптимизација во образованието не смее да се спроведува на сметка на наставниците и професорите.

Тој оцени дека илјадници просветни работници се соочуваат со неизвесност за своите работни места, додека, како што рече, Владата не покажува подготвеност да ги намали сопствените трошоци и привилегии.

— реклама —

„Зборуваме за учителите, наставниците и професорите, чија работа не е само професија. Тие воспитуваат, образуваат, инспирираат и ја креираат иднината. А ние овие закони ги носиме во полупразна сала“, рече Митрески.

Тој посочи дека намалувањето на бројот на ученици не е вина на наставниците и професорите, туку резултат на долгогодишни политики.

„Ние сме виновни што бројот на населението и учениците се намалува. И ние и тие пред нас. Триесет години дозволувавме тоа да се случува, а сега ќе удриме по наставниците и професорите“, истакна Митрески.

— реклама —

Пратеникот нагласи дека, доколку навистина постои потреба од оптимизација, таа треба да започне од институциите.

„Ако сакаме оптимизација во државата, прво треба да почнеме од себе. Владата има 30 министри, заменици министри, државни секретари, кабинети, службени возила и секретарки. Ајде прво таму да кратиме и да покажеме пример“, рече тој.

— реклама —

Митрески предложи да се размисли и за намалување на бројот на пратеници во Собранието како дел од процесот на рационализација.

Осврнувајќи се на измените на законите, тој предупреди дека директорите на училиштата ќе се најдат под дополнителен притисок поради новите одредби за формирање паралелки со помал број ученици.

„Не може да зборуваме за оптимизација, а истовремено да очекуваме директорите да се соочуваат со казни ако формираат паралелки без согласност“, рече Митрески.

— реклама —

Тој додаде дека, доколку продолжат ваквите политики, образовниот систем ќе се соочи со уште посериозни последици во иднина.

„Ако продолжиме вака, училиштата навистина ќе ги претвориме во старечки домови, затоа што во државата ќе останат да живеат само пензионери“, порача Митрески.