Во своето илинденско слово, митрополитот Кумановско-Осоговски г. Григориј упати остри критики кон политиката на Бугарија кон Македонија, оценувајќи дека таа претставува „трагедија на заедничкото добро“ и „трагедија на православното христијанство“.
Осврнувајќи се на односите меѓу двете држави, митрополитот посочи дека политиката „направи го својот сосед – просјак“ има за цел да ги влоши политичките и економските состојби во соседната држава, оценувајќи дека таквиот пристап ѝ носи корист на државата што го спроведува, а им штети на соседите.
Во словото, тој ја критикуваше и Европската Унија, тврдејќи дека покажува протекционистички однос кон Бугарија и дека не реагира соодветно на, како што наведе, повредите на принципите за човекови права, недискриминација и владеење на правото.
Митрополитот Григориј оцени дека барањата за уставни и законски измени во Македонија претставуваат мешање во внатрешните работи на суверена држава и изрази став дека тие можат да имаат последици врз македонскиот национален идентитет.
Во своето обраќање тој порача дека љубовта кон сопствениот народ не треба да се претвори во национализам и непријателство кон соседите, повикувајќи се на библиската порака „Сакај го ближниот свој како себеси“.
