Заменик директорот на Македонски шуми, Кире Михаилов предупреди на, како што наведува, зголемена појава на нелегална сеча на родни дрвја низ повеќе региони во Македонија, оценувајќи ја состојбата како „нов екотероризам“.
Според Михаилов, во текот на неделата при движење низ различни делови од државата бил забележан зголемен интензитет на сеча на сливи, особено во ридско-планинските предели, како и на тополи.
Тој тврди дека поради засилените контроли на терен, дел од дрвокрадците се пренасочиле кон дрвни видови кои се наоѓаат на државно земјиште, но не подлежат на Законот за шуми.
„Апелирам до институциите да се вклучиме во посериозна контрола во сечата на овие дрвни видови“, наведува Михаилов, додавајќи дека дрвата често завршуваат во дворовите на граѓаните преку фирми што тргуваат со огревно дрво.
Тој посочува дека овошните дрвја имаат важна улога во природниот екосистем, не само поради производството на кислород, туку и како извор на храна за дивите животни и птиците.
„Оваа појава на нов зголемен екотероризам мора да ја спречиме“, порачува Михаилов.
