Млад Македонец со сериозна повреда на ’рбетниот мозок е успешно транспортиран од Турција во Македонија

Млад македонец со сериозна повреда на ’рбетниот мозок е успешно транспортиран од Турција во Македонија, информираат од Министерството за здравство.

— реклама —

Пациентот се здобил со повредата при несреќа на тобоган за време на одмор во Кушадаси. На 23 јули му била извршена хируршка интервенција во локална болница, каде што бил задржан на лекување до транспортот во земјава.

— реклама —

Поради сериозноста на повредата и препораката на турските лекари, Министерството за здравство во координација со Владата, Службата за општи и заеднички работи и медицинските тимови организирало воздушен медицински транспорт со владин авион.

Во Турција бил испратен стручен медицински тим, предводен од раководителката на КАРИЛ, д-р Марта Тренева, кој го презел пациентот и обезбедил медицински надзор во текот на транспортот до Скопје.

— реклама —

Пациентот е примен на одделот за интензивно лекување при Клиниката за ТОАРИЛУЦ, каде што ќе продолжи со лекувањето. Од Министерството информираат дека во следниот период ќе бидат направени дополнителни испитувања, по што ќе се утврди натамошниот тек на лекувањето и рехабилитацијата.

Во зависност од неговата здравствена состојба, предвидена е и физикална терапија во спиналниот центар во земјава.