Дваесет и тригодишната манекенка и прва придружничка на изборот за Мис Универзум Тегусигалпа 2026, Вуалис Фуентес Акино, е пронајдена мртва во својот стан во главниот град на Хондурас, Тегусигалпа.
Според бразилскиот весник „О Глобо“, членовите на нејзиното семејство ја пронашле без знаци на живот во понеделникот, откако неколку дена не успеале да стапат во контакт со неа.
Надлежните институции ја истражуваат нејзината смрт и засега не ја исклучуваат можноста за кривично дело, додека паралелно се проверува и дали станува збор за природна смрт.
Организацијата „Мис Универзум Тегусигалпа“ во средата, преку објава на Инстаграм, ја потврди трагичната вест и изрази сочувство до нејзиното семејство и пријателите.
„Оваа вест нè погоди длабоко бидејќи дојде сосема неочекувано. Вуалис не блескаше само со своето присуство, туку секогаш им помагаше и на другите натпреварувачки. Засекогаш ќе остане дел од нашето семејство“, наведоа од организацијата.
Акино студирала меѓународен маркетинг и социјална работа на Автономниот национален универзитет на Хондурас, а паралелно градеше и успешна кариера во светот на модата. На социјалните мрежи редовно објавуваше фотографии од патувања, секојдневниот живот и професионалните ангажмани.
Само неколку дена пред смртта, таа сподели мотивациска порака покрај фотографии и видео од боксерски тренинг, пишувајќи дека боксот не е само прашање на победа или пораз, туку и на тоа како човек се справува со сопствените предизвици и продолжува понатаму.
На изборот за Мис Универзум Тегусигалпа учествуваше во јуни годинава, каде што ја освои титулата прва придружничка, додека победничка беше Лусијана Нуњес.
