Млади момчиња во Хрватска завршуваат на суд затоа што не се јавиле на лекарски преглед за воена служба

Неколку млади момчиња во Хрватска, меѓу кои и средношколци, во изминатите недели се соочиле со судски постапки бидејќи не се јавиле на поканите за лекарски прегледи со кои треба да се утврди нивната способност за служење воен рок.

Додека некои добиле парични казни, други биле ослободени од обвиненијата бидејќи било утврдено дека поканите не им биле уредно доставени, објави хрватскиот портал „Средња.хр“.

Општинскиот суд во Чаковец минатиот месец правосилно казнил средношколец од Меѓимурје со 250 евра. Момчето, кое се образува за автолакер, во средината на јуни не се појавило на лекарски преглед и психолошко тестирање во Домот на здравјето во Чаковец.

— реклама —

На судот го признало прекршокот. Бидејќи претходно не било прекршочно казнувано и го издржуваат родителите, судот му изрекол казна пониска од законскиот минимум, кој изнесува од 500 до 5.000 евра.

Слични случаи имало и пред Општинскиот прекршочен суд во Загреб, кој донел неколку неправосилни пресуди.

Еден 19-годишник бил казнет со 120 евра и дополнителни 30 евра судски трошоци затоа што го преспал терминот за преглед. Во писмената одбрана објаснил дека претходната ноќ се вратил од патување со мајка му и баба му.

— реклама —

Тој навел дека веднаш контактирал со надлежната служба, но му било одговорено дека може да дојде само ако се појави во рок од пет минути, што било невозможно.

Истиот суд казнил и студент роден во 2007 година со 120 евра и 30 евра судски трошоци. Тој го признал прекршокот и објаснил дека го запомнил погрешниот датум за прегледот, па задоцнил еден ден.

Сепак, не завршиле сите случаи со казни.

Минатиот месец, Општинскиот прекршочен суд во Загреб ослободил млад човек од обвинението дека на почетокот на мај не се појавил на преглед. Тој изјавил дека никогаш не ја примил ниту ја потпишал поканата, објаснувајќи дека во неговата куќа живеат четири семејства.

— реклама —

По проверката на повратницата, судот утврдил дека пратката била оставена во поштенското сандаче без потпис од примателот. Поради тоа, немало доказ дека поканата била уредно доставена.

Слична неправосилна пресуда во средината на септември донел и Општинскиот суд во Вараждин. Било ослободено момче родено во 2007 година, кое на судот изјавило дека лично не ја примило поканата бидејќи во тој период работело во Германија.

Тој навел дека е можно поканата да ја презел некој од членовите на семејството или соседите, а го оспорил и потписот на доставницата за кој било наведено дека е на неговата мајка, објаснувајќи дека таа е неписмена.

Судот ги споредил потписите и заклучил дека не е докажано оти момчето лично ја примило поканата.

На почетокот на септември, Општинскиот прекршочен суд во Загреб ослободил уште еден млад човек. Тој не се појавил на прегледот во јули, а во одбраната навел дека не можел да ја прими поканата бидејќи сезонски работел во продавница на островот Чиово.

И во овој случај судот утврдил дека потписот на доставницата се разликува од неговиот. Бидејќи било заклучено дека поканата не била уредно доставена, младиот човек бил ослободен од обвинението.