Македонската медиумска асоцијација (ММА) и Македонската радио-телевизија (МРТ) соопштија дека бараат надлежните институции да го испитаат работењето на телевизиските сервиси Arena M1, M2 и M3 Premium, за кои тврдат дека подолг период функционираат без домашна дозвола, додека Агенцијата за аудио и аудиовизуелни медиумски услуги (АВМУ) ги третира како странски програмски сервиси.
Во заедничкото соопштение ММА и МРТ наведуваат дека имаат материјални докази оти овие канали се произведуваат во Скопје. Според нив, продукцијата, новинарите, коментаторите и гостите се во земјава, студиските емисии се создаваат во Скопје, а програмата се емитува на македонски јазик.
Дополнително во соопштението посочуваат дека Arena M1, M2 и M3 Premium не се евидентирани во регистарот на српскиот регулатор REM, поради што, како што наведуваат, не може да се третираат како домицилни српски телевизиски канали. Спротивно на тоа, во евиденциите на операторите одобрени од АВМУ, каналите се водат како странски сервиси со програма на српски јазик.
ММА и МРТ бараат истражните и надлежните институции да утврдат дали со ваквото постапување се заобиколува законската обврска за поседување дозвола за работа, дали е нанесена финансиска штета на буџетот поради евентуално неплаќање лиценца и дали постои одговорност кај сопствениците и одговорните лица на телевизиските сервиси, но и кај службени лица во АВМУ.
Воедно, бараат проверка и на можноста за неовластено користење премиум спортски телевизиски права, односно телевизиска пиратерија. ММА и МРТ посочуваат дека надлежните институции треба да го испитаат и долгогодишното реемитување на одредени телевизиски канали од регионот.
Двете организации предупредуваат и на најавениот Euronews Македонија, стравувајќи дека и овој сервис би можел да биде третиран како странски програмски сервис на сличен начин како Arena Premium каналите.
„Беззаконието кое денес се толерира како исклучок, утре може да стане правило“, се наведува во соопштението.
ММА и МРТ најавуваат дека ќе поднесат соодветни поднесоци до Јавното обвинителство и Министерството за внатрешни работи со барање да се испита постапувањето и евентуалната одговорност на надлежните лица во АВМУ.
