Министерството за надворешни работи и надворешна трговија ги повика македонските државјани кои престојуваат во Државата Катар и Обединетите Арапски Емирати внимателно да ги следат официјалните информации и да постапуваат согласно упатствата на надлежните институции на земјите домаќини, поради актуелната безбедносна состојба во регионот.
Во објава, Министерството информира дека граѓаните кои имаат потреба од помош или дополнителни информации можат да се обратат во Амбасадата на Република Северна Македонија во Доха на телефонскиот број +974 50 173 111 или на електронската адреса doha@mfa.gov.mk, како и во Амбасадата во Абу Даби на +971 56 441 7532 и abudabi@mfa.gov.mk.
На располагање е и дежурниот контакт на Министерството за надворешни работи и надворешна трговија преку телефонските броеви +389 75 273 732 и +389 75 268 736, како и електронската адреса globalsos@mfa.gov.mk.
Од Министерството посочуваат дека континуирано ја следат состојбата и најавуваат дека јавноста ќе биде навремено информирана за сите релевантни информации.
