Морничава тајна на фараоните: Научниците открија траги од насилни смртни случаи стари 5.000 години

Антрополозите откриле докази за насилна смрт на голем број дворски службеници погребани покрај фараоните од Првата династија во некрополите Абидос и Ум ел-Каб, со што е поддржано постоењето на човечки жртви во раната историја на древен Египет.

Значителниот напредок во форензичките и биоархеолошките истражувања им овозможил на научниците да дознаат повеќе за човечкото жртвување во древен Египет, а доказите за тоа се пронајдени во гробниците на првите египетски фараони, се наведува во најновата студија што ја пренесува порталот „Фронтиерс“.

— реклама —

Новите методи на истражување биле применети врз посмртните останки во кралските погребни комплекси од периодот на Првата династија, околу 3078–2900 година пр.н.е., на локалитетот Ум ел-Каб во Абидос, каде што стотици дворски службеници и занаетчии биле погребани околу гробниците на раните владетели.

Користејќи го примерот на Абидос, холистичкиот пристап што ја карактеризира биоархеологијата како научна дисциплина овозможува не само повторно да се толкуваат бројни збирки наоди од минатото, туку и темелно да се преиспита начинот на кој се разбирало општеството на древен Египет и Нубија.

Современите анализи покажале дека на посмртните останки на многу лица во Абидос има повреди настанати во моментот на смртта, како и дека првичните истражувачи веројатно ги забележале овие повреди, но погрешно ги протолкувале како оштетувања настанати по смртта.

— реклама —

„Во многу древни култури, слугите често биле жртвувани заедно со своите господари за да продолжат да им служат во задгробниот живот. Исто така, можно е тоа да било демонстрација на моќта на владетелот – некои дворјани можеби доброволно се жртвувале заради вечен задгробен живот, додека други биле жртвувани со насилство“, објаснила Розалин Кембел, истражувачка на Универзитетот Пердју во САД.

Се покажало дека во 39 отсто од случаите черепите на древните Египќани имале карактеристични пукнатини предизвикани од удар со тап, рамен предмет во тилот или друг дел од черепот. Таквите повреди, како што покажува анализата на научниците, би довеле до ненадејно губење на свеста, внатрешно крварење и брза смрт на дворјаните, што ја поддржува идејата за ритуално убиство, заклучила Кембел.

— реклама —

Напредокот во сознанијата за причините и механизмите на повредите, тафономијата и нијансите на социоекономскиот статус видливи преку начинот на погребување овозможува повторно да се разгледаат првичните заклучоци до кои истражувачите дошле пред еден век.

Современите методи биле применети особено врз збирката посмртни останки што истражувачот Флиндерс Питри ги ископал во дваесеттите години на 20 век во Абидос, во јужен Египет.

Раните истражувачи сметале дека тие претставуваат докази за човечки жртви на самиот почеток на египетската држава.

— реклама —

Примената на знаењата и резултатите од истражувањата собирани во текот на целиот еден век овозможила повторна процена на овие наоди и осовременување на сознанијата, со што биле потврдени овие заклучоци.

Новите сознанија, сепак, истовремено го усложниле разбирањето на наодите, јасно покажувајќи дека погребните ритуали поврзани со погребувањето на владетелите од Првата династија веројатно биле посложени и поразновидни отколку што се претпоставувало.