Москва би можела да преземе дел од бизнисот на Nestlé во Русија

Швајцарскиот прехранбен гигант Nestlé би можел да ја изгуби контролата врз пет свои компании во Русија, откако локална логистичка компанија наводно побарала од рускиот претседател Владимир Путин тие да бидат ставени под привремена државна управа.

— реклама —

Според рускиот весник „Комерсант“, рускиот владин апарат би требало да го разгледа барањето до крајот на годинава. Ваквата одлука би можела да биде прв чекор кон промена на сопственичката структура на компаниите.

Од Nestlé, сепак, велат дека руските власти засега не стапиле во контакт со компанијата и дека нејзините фабрики и канцеларии во Русија продолжуваат да работат.

— реклама —

Швајцарската компанија соопшти и дека ги исполнува своите обврски и во моментов нема планови за повлекување од рускиот пазар.

— реклама —

Случајот потсетува на судбината на повеќе западни компании кои во изминатите години го напуштија рускиот пазар под услови наметнати од Москва. Во 2023 година, руските власти го ставија бизнисот на францускиот Danone под привремена државна управа, по што компанијата во 2024 година го продаде рускиот бизнис за околу 180 милиони евра, со вкупна загуба од околу 1,2 милијарди евра.

Слично помина и Carlsberg, додека Heineken ја продаде својата руска подружница за симболичен износ од едно евро, со загуба од околу 300 милиони евра.

Аналитичарите на JPMorgan проценуваат дека Nestlé би можел да го изгуби рускиот бизнис, кој учествува со околу два отсто во приходите на компанијата. Потенцијална присилна продажба за значително помал износ би можела да го намали профитот по акција на Nestlé за околу три до четири отсто.