Русија и Ватикан успеваат да го одржат дијалогот заснован на заемна почит и доверба и покрај сложената меѓународна ситуација, порача рускиот министер за надворешни работи Сергеј Лавров на средбата со секретарот за односи со државите на Светата Столица, Пол Ричард Галагер.
Лавров истакна дека комуникацијата меѓу Москва и Ватикан овозможува да се бараат „позитивни и реалистични решенија“ во услови на бројни меѓународни кризи.
Од своја страна, Галагер нагласи дека во актуелните сложени меѓународни односи дипломатијата е повеќе потребна од кога било. Тој оцени дека дијалогот е од исклучително значење и изрази благодарност за можноста двете страни да разговараат и да разменат информации.
Претставникот на Светата Столица посочи дека е од витално значење да се одржува комуникациската линија со Москва, без оглед на постојните тешкотии.
Галагер е во официјална посета на Русија до 28 август. Во текот на посетата се очекува да оствари средби и со претставници на Московската патријаршија, како и со членовите на малата католичка заедница во Русија.
