Руската Централна изборна комисија соопшти дека за време на парламентарните избори биле регистрирани повеќе од илјада сајбер-напади насочени кон инфраструктурата поврзана со изборниот процес.
Претседателката на комисијата, Ела Памфилова, изјави дека станува збор за DDoS-напади, односно обиди преку огромен број лажни барања да се преоптоварат веб-страници, сервери и мрежи и да се оневозможи нивното нормално функционирање.
Според Памфилова, нападите биле изведени од „високопрофесионални и добро координирани групи“ кои користеле алатки со вештачка интелигенција, а најголемиот дел од нападите потекнувале од странство.
Таа соопшти и дека биле извршени насочени напади врз руската телекомуникациска инфраструктура, при што, како што наведе, биле забележани знаци на украинско мешање.
Руската Изборна комисија уште во саботата соопшти дека изборниот систем бил цел на „многу силен сајбер-напад“ кој траел во текот на целиот ден.
Гласањето се одвива и по електронски пат во околу 30 региони.
