Мртво новороденче пронајдено во кеса покрај пат во Германија, полицијата трага по мајката

Полицијата во германскиот град Бекум трага по мајката на новородената девојка чие безживотно тело било пронајдено покрај пат, оставено во кеса за купување.

Телото било пронајдено пред шест дена, по што полицијата започнала истрага и објавила фотографии од местото, со апел до граѓаните да помогнат со информации.

— реклама —

Според досегашните сознанија, бебето било оставено во саботата, во периодот меѓу 11 и 13:30 часот, на улицата Алтер Хамвег, југоисточно од Минстер.

Идентитетот на мајката, која непосредно пред пронаоѓањето се породила, засега не е познат. Обдукцијата не дала јасен одговор за причината за смртта, па истрагата треба да утврди и дали станува збор за кривично дело.

— реклама —

Новороденчето било ставено во кеса од продавницата за мебел „Поко“, на која имало отпечатено насмеано лице. Бебето било завиткано во црвено-бела карирана прекривка и светол пешкир за сауна со етикета „Möve for frottana“.

— реклама —

Полицијата се надева дека некој ќе ги препознае предметите и ќе помогне во утврдувањето од каде потекнуваат.

Истрагата опфаќа и дополнителни пребарувања на подрачјето на улицата Алтер Хамвег и во близина на коњичкиот клуб. Од полицијата апелираат граѓаните да ги пријават и информациите што можеби им изгледаат незначителни.

Се проверува и можноста мајката подолг период да ја криела бременоста. Затоа полицијата ги повикува граѓаните да се јават доколку забележале девојка или жена кај која неодамна дошло до невообичаена промена во однесувањето или изгледот.

Во тек се дополнителни испитувања за да се утврди точната причина за смртта на новороденчето.