МВР објасни: Кандидатот не ја поминал административната селекција, затоа не бил повикан на проверка на моторичките способности

Министерството за внатрешни работи ги демантира наводите дека кандидат за прием во Средното полициско училиште „7-ми Мај“ не бил повикан на проверка на моторичките способности, иако ги исполнувал условите од јавниот повик.

— реклама —

Од МВР посочуваат дека селекцијата сè уште трае и се одвива во повеќе последователни фази. На проверка на моторичките способности се повикуваат само кандидатите кои претходно успешно ја поминале административната селекција.

— реклама —

Во оваа фаза се проверува, меѓу другото, дали кандидатите имаат најмалку „добар“ општ успех во двете завршени години средно образование и дали во тој период не им биле изречени педагошки мерки.

Од МВР појаснуваат дека конкретниот кандидат не бил повикан на проверка на моторичките способности бидејќи не ја поминал административната селекција, односно не ги исполнил сите услови што се проверуваат во оваа фаза.

— реклама —

По завршувањето на целата постапка, кандидатите ќе бидат известени за исходот, а ќе имаат можност и за увид во документацијата согласно предвидената постапка.

— реклама —

МВР апелира да не се објавуваат неточни и непотврдени информации пред официјалното завршување на селекцијата и нагласува дека постапката се спроведува според критериумите од јавниот повик и со еднаков третман на сите кандидати.