МВР и американската ДЕА помогнале во пресретнување над 300 килограми кокаин во Германија - патувала од Еквадор преку Холандија

Над 300 килограми кокаин биле запленети во Германија, откако македонската полиција и американската Агенција за борба против дрога (ДЕА) размениле оперативни информации што помогнале во пресретнувањето на меѓународен канал за шверц на наркотични средства, неофицијално дознава Скопје1 од извори запознаени со истрагата.

Според информациите на Скопје1, кокаинот бил скриен во товарен контејнер со банани, кој пристигнал од Еквадор на пристаниште во Холандија, по што бил транспортиран во Германија.

— реклама —

Токму таму германската полиција ја пресретнала пратката и запленила повеќе од 300 килограми кокаин.

Како што дознава Скопје1, на заплената ѝ претходела брза размена на оперативни информации меѓу Одделот за криминалистичка полиција при Министерството за внатрешни работи на Македонија и американската ДЕА.

— реклама —

Информациите биле значајни за постапувањето на германските полициски служби, кои ја реализирале заплената на наркотичната дрога.

Случајот укажува на меѓународните размери на каналите за недозволена трговија со дрога, во кои пратките минуваат низ повеќе држави пред да стигнат до крајната дестинација.

— реклама —

Според досегашните неофицијални сознанија, кокаинот бил транспортиран од Јужна Америка преку европските транспортни рути, со користење легален товар како прикритие.

Засега нема официјални информации за бројот на осомничени или приведени лица, за крајната дестинација на дрогата, ниту за тоа дали во криминалниот канал биле вклучени македонски државјани.

— реклама —

Исто така, сè уште нема официјално соопштение од надлежните институции со кое се потврдуваат точната количина на запленетиот кокаин и деталите за меѓународната операција.

Скопје1 очекува дополнителни информации за акцијата и улогата на македонските полициски служби во нејзината реализација.