Македонски државјанин под истрага на ФБИ: Од Голема Речица управувал со платформа за сајбер-криминал, тврди МВР

Дваесетгодишник од тетовското село Голема Речица е осомничен дека управувал со нелегален онлајн пазар преку кој се продавале украдени лични податоци, пристапи до кориснички сметки и компјутерски мрежи, како и алатки за извршување компјутерски криминал. До неговото откривање дошло по заедничка истрага на македонското Министерство за внатрешни работи и американското Федерално истражно биро (ФБИ).

Секторот за компјутерски криминал и дигитална форензика при МВР поднел кривична пријава до Основното јавно обвинителство Тетово против Е.А. (20), поради сомнение за сторени кривични дела „компјутерска измама“, „злоупотреба на лични податоци“ и „производство и дистрибуција на детска порнографија“.

Според полицијата, истрагата започнала по информации добиени од ФБИ, по што била воспоставена координирана соработка меѓу американските и македонските истражители.

— реклама —

Обезбедените докази, како што наведува МВР, укажуваат дека осомничениот во периодот од 2023 до 2025 година управувал со домени и интернет-страници поврзани со платформата „OLVX“, која функционирала како нелегален пазар за продажба на украдени дигитални податоци и софтверски алатки за извршување кривични дела.

На платформата, според истрагата, главно тргувале лица вклучени во компјутерски криминал. Се продавале лични податоци на жртви, кориснички имиња, лозинки и други информации што овозможуваат пристап до туѓи профили и компјутерски мрежи.

— реклама —

За време на функционирањето на нелегалниот пазар биле понудени повеќе од 1.500 украдени пристапни податоци.

Но, истрагата не завршила со платформата „OLVX“. Полицијата утврдила дека во периодот од 2025 до 2026 година осомничениот управувал и со нелегална група на комуникациската апликација „Телеграм“, наречена „ONEMILI“.

Преку оваа група, според МВР, биле нудени услуги и софтверски алатки за извршување компјутерски кривични дела, вклучително и измами поврзани со незаконско враќање парични средства.

— реклама —

Дополнително, истражителите обезбедиле докази кои, според полицијата, укажуваат дека осомничениот преку „Телеграм“ набавувал и поседувал материјали со сексуална злоупотреба на деца.

Од МВР посочуваат дека ова е првата заедничка координирана сајбер-операција меѓу македонската полиција и американското ФБИ.

— реклама —

Според Министерството, случајот ја покажува важноста на меѓународната полициска соработка во откривањето на криминални активности што се одвиваат преку интернет и ги надминуваат државните граници.

МВР најавува продолжување на активностите за сузбивање на компјутерскиот криминал, заштита на личните податоци и зголемување на безбедноста на граѓаните во дигиталниот простор.

Против дваесетгодишникот засега е поднесена кривична пријава, а за евентуалната кривична одговорност ќе одлучуваат надлежните правосудни органи.