Министерството за внатрешни работи предупредува на нови фишинг-измами преку лажни пораки од системот „Безбеден град“, со кои граѓаните се наведуваат да внесат лични податоци или да извршат уплата за наводен сообраќаен прекршок.
Според МВР, во изминатиот период се регистрирани лажни СМС и електронски пораки, веб-страници, мобилни апликации и пораки на социјалните мрежи. Во дел од нив, испраќачите се претставуваат како Одделот за моторни возила и користат лажни линкови преку кои граѓаните се пренасочуваат кон наводна уплата на казна.
Од МВР апелираат граѓаните да не отвораат сомнителни пораки и линкови и да не споделуваат броеви од банкарски картички, лозинки и лични идентификатори преку неовластени канали. Се препорачува и проверка на адресата на испраќачот, користење двофакторска автентикација и пријавување на сомнителните пораки во надлежните институции или во банката.
МВР посочува дека вистинските СМС-известувања за сообраќајни прекршоци треба да бидат испратени од „MVR-SC“. Во пораката задолжително треба да има регистарска ознака од возилото со кое е направен прекршокот, како и линк што започнува со официјалната адреса на системот „Безбеден град“ https://safecountry.mvr.gov.mk.
