МВР со засилени контроли: 6.932 прекршоци и 503 кривични пријави за возачи на мопеди и мотоцикли

Повеќе од 6.900 прекршоци се констатирани во засилените сообраќајни контроли што Министерството за внатрешни работи ги спровело во периодот од 18 мај до 31 јули, насочени кон возачите на велосипеди со помошен мотор, мопеди, мотоцикли, трицикли и четирицикли.

— реклама —

Од МВР информираат дека во овој период биле регистрирани вкупно 6.932 прекршоци од возачи на овие видови возила, како и дополнителни 33 прекршоци сторени од велосипедисти.

Најмногу прекршоци биле констатирани на подрачјето на СВР Скопје – 2.146, потоа во СВР Битола – 992, СВР Велес – 856, СВР Куманово – 583, СВР Штип – 544, СВР Тетово – 541, СВР Охрид – 420 и СВР Струмица – 327. Мобилната единица за безбедност на сообраќајот на патиштата регистрирала уште 556 прекршоци.

— реклама —

Дури 5.678 од прекршоците се однесувале на неносење заштитен шлем – кацига при управување со овие возила. За сите констатирани прекршоци биле преземени соодветни мерки согласно со Законот за безбедност на сообраќајот на патиштата.

— реклама —

Во рамки на контролите биле утврдени и 15.715 други прекршоци, додека против 503 возачи биле поднесени кривични пријави согласно со член 297-а од Кривичниот законик.

МВР најавува дека продолжува со засилените контроли на целата територија на државата, со цел зголемување на безбедноста во сообраќајот.

Од Министерството апелираат до возачите на велосипеди, мопеди, мотоцикли, трицикли, четирицикли и лесни електрични возила да ги почитуваат сообраќајните правила, задолжително да користат заштитен шлем и да не управуваат под дејство на алкохол или други психоактивни супстанции.