Забраната за користење на водата од гостиварскиот водовод за пиење и подготовка на храна останува во сила сè додека лабораториските анализи не потврдат дека таа е целосно безбедна, соопшти директорот на Агенцијата за храна и ветеринарство (АХВ), Оливер Миланов.
Тој информираше дека веднаш по добиените сознанија за загадувањето, АХВ издала решение за привремена забрана на употребата на водата и наложила преземање итни мерки. Според Миланов, во најкус можен рок треба да се обезбедат техничка вода и вода за пиење за жителите на Гостивар, а на локалните власти им е наложено да спроведат активности за санација на системот.
Миланов посочи дека последниот извештај што АХВ го добила од Центарот за јавно здравје – Гостивар бил од 13 јули и во него било наведено дека водата е исправна за пиење. Во меѓувреме, истрагата на Основното јавно обвинителство утврди дека во периодот од 25 јуни до 16 јули во водоснабдителниот систем биле поставени диви пумпи кои внесувале вода со фекално загадување во мрежата.
Според Обвинителството, при увидот извршен на 16 јули било констатирано дека две потопни пумпи сè уште работеле и преку црева внесувале вода од отворен канал со колиформни бактерии во комората од која се снабдува системот за вода за пиење.
Во тек се засилени инспекциски контроли, при што мостри се земаат од целиот водоснабдителен систем, како и од градинки, здравствени установи, угостителски објекти, верски објекти и други јавни институции. Од АХВ најавија дека ќе бидат санкционирани сите субјекти кај кои ќе се утврди непочитување на изречените мерки.
Миланов ги повика граѓаните строго да ги почитуваат препораките на здравствените институции и да не ја користат водата за пиење или подготовка на храна сè додека не бидат објавени конечните лабораториски резултати.
Министерот за животна средина и просторно планирање, Муамет Хоџа, оцени дека станува збор за сериозен инцидент и порача дека мора целосно да се утврдат сите околности, како и кривичната и моралната одговорност на сите инволвирани.
Во истрагата на Обвинителството осомничени се директорката на ЈП „Комуналец“ – Гостивар, Артана Асани, техничкиот раководител Леон Нуредини и раководителот на Одделението за водовод, канализација и градежни работи, Вадедин Дервиши. Според сомнежите, тие овозможиле загадување на водата во системот што со вода за пиење ги снабдува Гостивар и дел од околните населени места.
