Германските цариници на аеродромот во Франкфурт за време на рутинска контрола откриле три живи змии во куфер на патник, кој тврдел дека животните биле наменети како изненадување за неговата мајка.
Инцидентот, кој се случил на 3 јуни, дури сега бил објавен во јавноста, пренесува германскиот весник „Билд“.
Дваесетгодишниот патник допатувал во Германија од Тајланд, преку Дубаи. При пристигнувањето тој изјавил дека не носи стока чија вредност надминува 430 евра, но при планираната рендгенска контрола се открила вистината.
Непосредно пред куферот да помине низ скенерот, младиот човек сам им признал на цариниците дека во багажот има живи змии. По неговото отворање, во куферот биле пронајдени три бели платнени вреќи, а во секоја од нив имало по една змија.
„Според документите што ги поседуваше патникот, станува збор за три виножитни боа-змии. Тие требало да бидат изненадување за неговата мајка, која живее во Германија“, изјави Изабел Гилман, портпаролка на Главната царинарница во Франкфурт.
Овие змии се познати по своите специфични светкави шари, кои под светлина создаваат ефект на виножито.
Иако првично патникот тврдел дека нема сметка за купените змии, подоцна доставил доказ дека ги купил за околу 2.400 американски долари.
Царинските власти пресметале увозни давачки во висина од 393,10 евра, а против патникот била поведена и даночно-кривична постапка, при што од него била земена кауција од 400 евра.
Бидејќи не биле утврдени прекршувања на прописите за заштита на животните и ветеринарните правила, по плаќањето на давачките и кауцијата, змиите му биле вратени на сопственикот.
Така, и покрај проблемите со царината, необичниот подарок на крајот пристигнал до својата крајна дестинација.
