„На Филипче му смета секој успех на државата, а не трепна кога заедно со Заев го продаваа името“, велат од ВМРО-ДПМНЕ

ВМРО-ДПМНЕ преку соопштение реагира на денешната прес-конференција на претседателот на СДСМ, Венко Филипче, оценувајќи дека нему му пречи секој успех на државата.

Од партијата велат дека Филипче зборува за распродавање на националните интереси, но го обвинуваат дека не реагирал кога, како што наведуваат, заедно со поранешниот премиер Зоран Заев биле донесени одлуки поврзани со името, јазикот и Уставот.

— реклама —

„Филипче денес се најде да зборува за распродавање, а не трепна кога Заев го распродаваше името, јазикот и Уставот на државата“, стои во реакцијата.

— реклама —

ВМРО-ДПМНЕ го обвинува Филипче и за, како што наведува партијата, селективна принципиелност во однос на најавените центри за податоци. Од партијата упатуваат и критики на неговото работење како министер, поврзувајќи го со набавки на вакцини и тендери.

Во реакцијата се посочува и економскиот раст, при што од ВМРО-ДПМНЕ наведуваат дека државата бележи осум последователни квартали со раст на БДП од над 3 отсто.

— реклама —

„Јасно ни е, на Филипче му пречи секој успех на Македонија, му пречат економските политики на Владата оти ја движат земјата во правилна насока“, наведуваат од партијата.

— реклама —

Од ВМРО-ДПМНЕ дополнително го обвинуваат Филипче за несоодветен однос кон одредени прашања, споменувајќи ги висококатниците во Дубаи, златните визи и јахтите во Грција, како и неговите односи со Заев.

Партијата прашува зошто, како што велат, на Филипче му пречат напорите на Владата за спроведување на нејзините политики и подобрување на животниот стандард на граѓаните.