Според анкетите на јавното мислење, екстремната десница ќе постигне значителен успех на изборите за Европскиот парламент, па поранешните маргинални партии ќе добијат влијание во Европската унија, пишува во анализата dpa.
Но, колку би можело да биде големо ова поместување надесно и колку ќе ја „потресе“ Европската Унија?
Веќе со месеци политичките аналитичари прогнозираат дека централно-левичарските и зелените партии ќе загубат пратенички места на сметка на десниот центар и екстремната десница на европските избори.
На почетокот на годината, Советот за надворешни работи предвиде дека ќе има „остро свртување надесно“ и дека антиевропските партии би можеле да победат на изборите во дури девет земји, вклучувајќи ги Белгија, Италија и Франција.
Дејствувањето на полето на климатските промени, растот на миграцијата и одговорот на неа, економската несигурност и гневот против естаблишментот се меѓу многуте причини поради кои аналитичарите го објаснуваат подемот на екстремната десница.
Сето горенаведено, засилено со руските кампањи за дезинформација, создаде моќен микс што ја издигна екстремната десница.
Поместувањето надесно може да влијае и на изборот на следниот претседател на Европската комисија, веројатно најмоќната улога во ЕУ.
Германската конзервативка Урсула фон дер Лајен од ЕПП бара втор мандат, но наоѓањето парламентарно мнозинство кое ќе ја поддржи може да се покаже исклучително тешко бидејќи политичките групи ги прилагодуваат своите потези на зголемената поддршка на гласачите од екстремната десница.
