На силен ветер, студ и густа магла, планинари ја обновуваат зимската патека кон Титов Врв, која беше демолирана

Повеќе од 20 планинари и волонтери, во услови на ниски температури, силен ветер и густа магла, учествувале во акција за обновување на оштетената зимска сигнализација на патеката од Попова Шапка кон Титов Врв на Шар Планина. За два дена биле поставени повеќе од 22 столбови, со цел да се подобри ориентацијата и безбедноста на планинарите во пресрет на зимската сезона.

Акцијата се одржала на 17 и 18 октомври, во организација на планинарскиот клуб „Бјешкатар Тетова“, кој претходно презел обврска пред австрискиот амбасадор да ги обнови уништените столбови на зимската планинарска патека.

— реклама —

Според информациите од клубот, новите столбови биле поставени на делницата од превојот Карабунар до Бакардан, додека дополнителни седум столбови биле пренесени и распоредени на локации каде што ќе бидат поставени во следните акции.

— реклама —

„И покрај ниските температури, силниот ветер и густата магла, повеќе од 20 учесници придонесоа со својата работа и посветеност“, информираат од планинарскиот клуб.

Акцијата била реализирана во соработка со Општина Тетово, Националниот парк „Шар Планина“, скијачкиот центар „Попова Шапка“, волонтери и учесници во претходното поставување на сигнализацијата.

— реклама —

Општина Тетово ги обезбедила потребните столбови, додека Националниот парк „Шар Планина“ помогнал во нивниот транспорт низ тешко пристапниот планински терен. Логистичка поддршка обезбедил и скијачкиот центар „Попова Шапка“.

Од клубот најавуваат дека активностите ќе продолжат сè додека целосно не се обнови зимската сигнализација, со намера работите да завршат пред почетокот на зимската сезона.

Целта е планинарите да имаат појасно обележана патека и полесно да се ориентираат при движење кон Титов Врв, особено во зимски услови кога снегот, маглата и намалената видливост го отежнуваат следењето на планинарските правци.

Од клубот изразија благодарност до институциите и волонтерите кои се вклучиле во акцијата, како и до дипломатските претставништва на Австрија, Чешка и Словачка за поддршката на проектот „Slavkov Hiking Trails“.

„Преземената одговорност ја исполнуваме со работа. Заедно за побезбедни патеки на Шар Планина“, порачаа од планинарскиот клуб „Бјешкатар Тетова“.