Над 15.000 хотели ја тужат „Букинг“: Со години не можеле слободно да ги одредуваат цените

Повеќе од 15.000 европски хотели се приклучија на колективна тужба против платформата „Букинг“, барајќи надомест на штета поради правилата што со години им го ограничувале слободното одредување на цените. Хотелиерите тврдат дека спорните клаузули ја намалиле конкуренцијата и ги принудиле да зависат од посредничката платформа.

Тужбата официјално била поднесена во Окружниот суд во Амстердам, а ја покренала независна холандска фондација со поддршка на европското здружение на хотелиери HOTREC и повеќе од 30 национални хотелски здруженија.

Спорот се однесува на таканаречените клаузули за паритет на цените, со кои „Букинг“ им забранувал на хотелите да нудат пониски цени на сопствените веб-страници или, во одредени случаи, преку конкурентски платформи. На тој начин, хотелите биле ограничени да им понудат поповолни услови на гостите кои резервирале директно, без посредство на платформата и нејзините провизии.

— реклама —

Хотелиерите сметаат дека ваквата практика со години ја ограничувала ценовната конкуренција, ги ослабувала нивните директни канали за резервации и ги зголемувала трошоците за посредување.

Нивните аргументи добиле поддршка и од пресудата на Судот на правдата на Европската Унија од пред две години. Судот заклучил дека широките и тесните клаузули за паритет не се објективно неопходни за функционирањето на платформата и дека можат да ја ограничат конкуренцијата.

— реклама —

Од „Букинг“, пак, ги оспоруваат тврдењата на хотелиерите. Компанијата наведува дека клаузулите за паритет долго време биле вообичаена практика во туристичката индустрија и дека им овозможувале на потрошувачите на едно место да ја пронајдат најдобрата достапна цена. Истовремено, платформата им обезбедувала на хотелите пристап до голем број потенцијални гости без потреба од почетни трошоци за рекламирање.

Покрај европскиот спор, „Букинг“ се соочува и со барања за поголема одговорност при рекламирањето сместувачки капацитети. Во Србија, властите веќе подолго време се обидуваат да го спречат рекламирањето нерегистрирани станови, куќи и други објекти преку големите интернет-платформи.

Во октомври 2024 година, српската влада најави „нулта толеранција“ кон угостителите кои нудат сместување преку ваквите платформи без да бидат регистрирани во Централниот информациски систем за е-туристи или, кога е потребно, без да имаат решение за категоризација.

— реклама —

Еден месец подоцна, претставници на српските власти разговарале со регионалните менаџери на „Букинг“ за регулирање на нерегистрираните сместувачки капацитети. Еден од клучните механизми е системот е-туристи, во кој регистрираните објекти добиваат единствен идентификациски број. Целта е да се спречи рекламирањето сместување што не е заведено во официјалните државни регистри.

За легалните издавачи, нерегистрираните објекти претставуваат нелојална конкуренција. Регистрираните сместувачки капацитети имаат обврска да ги евидентираат гостите, да плаќаат даноци и туристичка такса и да ги исполнуваат законските услови, додека нерегистрираните можат да ги избегнуваат овие обврски, а сепак да стигнат до туристите преку истите глобални платформи.

Ова е важно и за гостите, бидејќи присуството на некој стан на позната платформа не гарантира дека објектот е регистриран, категоризиран или дека ги исполнува сите законски услови. Поради тоа, српските власти се обидуваат да ги поврзат локалните регистри со системите за рекламирање и јасно да ги разликуваат легалните од нерегистрираните објекти.

Иако станува збор за различни проблеми, европската тужба за ограничување на цените и српските напори за сузбивање на нерегистрираното сместување го отвораат истото прашање: колкава одговорност треба да има глобалната платформа која посредува во голем дел од туристичкиот пазар.

Локалните хотелиери не биле расположени да го коментираат тековниот судски спор, а според информациите во текстот, хотелите од Србија не се дел од колективната тужба што го привлече вниманието на европската туристичка индустрија.