За семејствата кои се соочуваат со тешкотии при остварувањето на желбата да станат родители, зголемувањето на бројот на БПО обиди на товар на Фондот веќе дава конкретни резултати. За само една година, стотици осигуреници ја искористиле можноста да продолжат со постапката и по третиот неуспешен обид.
Од Фондот за здравствено осигурување информираат дека од 7 август 2025 до 20 август 2026 година биле поднесени и разгледани вкупно 1.883 барања за биомедицинско потпомогнато оплодување. Од нив, 237 се однесувале на четвртиот, петтиот или шестиот обид.
Најголем дел од дополнителните барања биле за четврти обид – 216. За петти обид биле поднесени 17 барања, додека четири осигуреници побарале и шести обид.
Со тоа, околу 12,6 отсто од сите барања разгледани во овој период се однесуваат на можностите што беа воведени со измените со кои бројот на БПО обиди на товар на Фондот беше зголемен од три на најмногу шест.
Од ФЗО велат дека промената била проследена и со олеснување на административната постапка. Известувањето за одобрено право на БПО се доставува електронски, а рокот за поднесување приговор е продолжен од осум на 15 дена.
Дополнително, за користење на здравствените услуги за БПО повеќе не е потребен дополнителен упат од избран лекар – гинеколог од примарната здравствена заштита. Осигурениците услугите ги користат врз основа на известувањето од Фондот.
БПО постапките се реализираат во осум здравствени установи со кои Фондот има склучено договори. Само во текот на 2025 година, за овие постапки биле реализирани повеќе од 97,3 милиони денари.
Од Фондот оценуваат дека проширувањето на правото има пошироко значење, особено во услови на намален наталитет и стареење на населението.
„Здравствениот систем сам не може да ги промени демографските текови, но може да направи нешто многу конкретно – да обезбеди повеќе можности и финансиската пречка да не биде причината поради која едно семејство ќе мора прерано да се откаже од обидот за потомство“, велат од ФЗО.
Оттаму посочуваат дека зголемувањето на бројот на обиди од три на шест не е само законска измена, туку дополнителна можност за семејствата кои сакаат да станат родители.
