Над 200.000 граѓани користеле бесплатен интернет на 72 јавни локации низ Македонија

Повеќе од 200.000 граѓани досега користеле бесплатен безжичен интернет на јавни места низ Македонија, преку проект поддржан од Европската Унија и Германија. Мрежата опфаќа 72 локации во 64 општини, овозможува брзина до 200 мегабити во секунда, а преку неа досега се пренесени над 115 терабајти податоци.

Овие податоци беа соопштени на завршниот настан на проектот „ЕУ за Западен Балкан – Wi-Fi во Македонија“, спроведен од ГИЗ во соработка со Министерството за дигитална трансформација и Македонски Телеком.

— реклама —

Евроамбасадорот Михаил Рокас истакна дека проектот е пример за конкретна соработка во рамките на иницијативата „Тим Европа“ и ја потврдува посветеноста на Европската Унија за подобрување на дигиталната поврзаност. Тој посочи дека и понатаму постојат подрачја, особено руралните и планинските населени места, каде што интернет-пристапот е ограничен и потребни се дополнителни вложувања за услугата да биде достапна за сите.

— реклама —

Според Рокас, над 200.000 уникатни корисници се добар почеток, но целта е бесплатниот интернет да стигне до уште повеќе граѓани и туристи. Тој го поздрави и напредокот на Министерството за дигитална трансформација, кое, како што посочи, е меѓу најдобро оценетите области во последниот извештај на Европската комисија.

Германската амбасадорка Петра Дрекслер нагласи дека проектот има за цел да обезбеди еднаков пристап до информации, образование и јавни услуги, независно од местото на живеење и финансиските можности на граѓаните. Таа оцени дека јавниот безжичен интернет треба да се смета за заедничка инфраструктура, слично како парковите и библиотеките, достапна за сите.

— реклама —

Министерот за дигитална трансформација Стефан Андоновски информираше дека првичната замисла била бесплатен интернет да се обезбеди во околу 40 општини, но поради големиот интерес од локалните самоуправи, проектот бил проширен на 64 општини со вкупно 72 локации.

— реклама —

Според него, досега пренесените повеќе од 115 терабајти податоци покажуваат дека мрежата активно се користи. Како можни места за проширување во следната фаза ги наведе Свети Наум, Дебарското Езеро, Маврово и Кокино.

Проектот е дел од пошироките активности за развој на дигиталната инфраструктура и подобрување на поврзаноста, предвидени во националната стратегија „Смарт МК 2030“. Андоновски посочи дека дигиталната трансформација не се однесува само на воведување електронски услуги, туку и на создавање услови сите граѓани да можат да ги користат, без цената или недостигот од интернет да претставуваат пречка.