Над 400 монети се пронајдени во текот на петгодишните систематски археолошки истражувања на локалитетот Градиште кај битолското село Црнобуки, а збирката е дополнета и со новите откритија од овогодишната истражувачка сезона, пренесува сакамдакажам.мк.
Координаторот на проектот, археологот и кустос-советник во Завод и музеј – Битола, Енгин Насух, посочува дека меѓу најзначајните наоди има монети ковани во времето на македонскиот крал Филип Втори Македонски, таткото на Александар Велики.
„На монетите од Филип Македонски е прикажан ликот на Зевс, а пронајдени се и монети од Октавијан Август, како и од античките градови Тесалоника, Пела, Амфиполис и Дирахион. Монетите ни помагаат да ја реконструираме хронологијата на градот што постоел во Црнобуки“, вели Насух.
Во претходните истражувања беше откриена и сребрена монета со ликот на Александар Велики, како и бројни сребрени монети од римскиот републикански период. Според археолозите, станува збор за едно од најголемите досега откриени депоа на сребрени монети од тој период во Македонија.
Иако постојат претпоставки дека локалитетот би можел да биде античката Персеида или главниот град на Линкестида, Насух нагласува дека засега не може со сигурност да се потврди за кој антички град станува збор.
Тој додава дека досегашните наоди потврдуваат оти станува збор за значаен град од македонско-хеленистичкиот период, кој опстојувал до крајот на старата ера, а пронајдени се и траги што упатуваат на населување уште во бронзеното време.
Истражувањата ги спроведува заеднички македонско-американски тим од Завод и музеј – Битола и Универзитетот „Кал Поли Хамболд“ од Калифорнија, а годинава беа истражени околу 75 квадратни метри, при што се откриени работилници, продавници, голем број керамички и метални предмети, како и нови монети од македонскиот и раноримскиот период.
