Над 623 милиони денари исплатил Фондот за здравствено осигурување во август за надоместоци по основ на привремена спреченост за работа, од кои повеќе од 414 милиони денари биле наменети за породилни отсуства.
Од ФЗО информираат дека во текот на месецот биле исплатени вкупно 623.150.780 денари, при што 414.050.780 денари се однесуваат на породилни надоместоци.
Според Фондот, високата реализација е резултат на засилена обработка на предметите и внимателно планирање на расположливите средства, со цел исплатите кон осигурениците да се одвиваат редовно.
При обработката бил почитуван хронолошкиот редослед, со приоритет за постарите барања. Од ФЗО посочуваат дека посебен акцент бил ставен на породилните надоместоци, по насока на генералниот директор Златко Перински.
Од Фондот најавуваат дека ваквата динамика ќе продолжи и во наредниот период, со фокус на редовна исплата на боледувањата и породилните надоместоци, но и на непречено исполнување на останатите обврски кон осигурениците и здравствениот систем.
