Над 70 отсто од кредитите поврзани со недвижности, Светска банка посочува ризици за финансискиот систем

Македонските домаќинства сè повеќе се потпираат на банкарски кредити, додека домашните банки сè поголем дел од средствата го насочуваат кон финансирање на државниот долг. Овие движења, според податоците од извештајот на Светската банка, отвораат прашања за стабилноста на финансискиот систем и ризиците со кои би можела да се соочи економијата.

— реклама —

Еден од забележаните трендови е побрзиот раст на кредитите за домаќинствата во споредба со кредитирањето на компаниите. До февруари годинава, кредитите на граѓаните пораснале за повеќе од 16 отсто. Овој податок укажува на зголемено задолжување за станбени потреби и одржување на животниот стандард, додека кредитирањето на стопанството бележи побавен раст.

— реклама —

Дополнителен ризик претставува фактот што околу 70 отсто од кредитите во македонскиот банкарски систем се поврзани со недвижности. Високата изложеност кон овој сектор би можела да ги зголеми ризиците за банките во случај на пад на цените на недвижностите или нарушување на состојбите на пазарот.

Поради зголеменото задолжување, Народната банка најави построги правила за кредитирање, кои треба да почнат да се применуваат од 1 декември. Со нив се предвидуваат ограничувања на висината на месечните рати и роковите за отплата на кредитите.

— реклама —

Друг предизвик е поврзаноста на банкарскиот сектор со финансирањето на државата. Според извештајот на Светската банка, државниот долг што го поседуваат домашните банки надминува 100 отсто од нивниот основен капитал. Тоа укажува на значителна изложеност на банките кон државните финансии, бидејќи голем дел од нивните средства се вложени во државни должнички инструменти.

— реклама —

Во случај на влошување на финансиската состојба на државата, ваквата поврзаност би можела да создаде дополнителен притисок врз банкарскиот систем. Во извештајот се посочуваат и знаци на забавување на профитабилноста на банките, што дополнително ја нагласува потребата од внимателно следење на ризиците.