Фудбалската репрезентација на Курасао ќе дебитира на Светското првенство, но вниманието на навивачите деновиве не е насочено само кон историскиот настап на оваа селекција, туку и кон нејзиниот резервен дрес, кој стана вистински хит пред почетокот на турнирот.
Жолтиот ретро-дрес со детали во розова, тиркизна и портокалова боја е инспириран од шарените фасади на главниот град Вилемстад и историските населби Пунда и Отробанда. Неговиот впечатлив изглед предизвика огромен интерес кај љубителите на фудбалот ширум светот.
Според медиумски извештаи, дресот е меѓу најпродаваните пред стартот на Мундијалот, а на американската интернет-продавница на „Адидас“ речиси сите големини биле распродадени, што ретко се случува дури и кај многу попознати репрезентации.
Фудбалерите на Курасао неодамна настапија во оваа гарнитура на пријателски натпревар против Шкотска, но постои голема веројатност навивачите да не го видат дресот на натпреварите од Светското првенство.
Имено, селекцијата предводена од искусниот тренер Дик Адвокат ќе игра во група со Германија, Еквадор и Брегот на Слоновата Коска, чии бои не се судираат со основната опрема на Курасао. Поради тоа, најверојатно нема да има потреба тимот да ја користи резервната гарнитура на турнирот.
Така, дресот кој веќе стана еден од симболите на претстојното Светско првенство би можел да остане запаметен повеќе по својата популарност меѓу навивачите отколку по настапите на теренот.
