Професорката Мирјана Најчевска во ,,Претрес со Ландов” говореше дека одговорноста за актуелната состојба во евроинтеграцискиот процес не лежи исклучиво кај Бугарија, туку и кај домашните пропусти и самата Европска Унија. Таа вели дека Бугарија не е најголем непријател на Македонија.
„Не мислам дека Бугарија е најголем непријател. Сами се доведовме во оваа ситуација со тоа што закаснивме со евроинтеграцискиот процес и дојдовме во позиција една Бугарија да влијае на натамошниот развој на Македонија.
Проблемот е во ЕУ, која мора многу побрзо да реагира на ваков вид внатрешни деформации и да изнајде начини да се спротивстави на членки кои можат да ја злоупотребат својата положба. Многу порано требало да се најде начин да се избегне ветото во ЕУ, уште во моментот кога биле примени држави кои фактички не ги исполнувале сите вредносни параметри – тоа се Бугарија, Романија и Унгарија. Тоа се држави кои имаат геостратешка позиција. Бугарија е важна за ЕУ затоа што е на Црното Море, кое граничи со Русија. Однапред се знаело дека тие држави не се до крај подготвени, а корупцијата, недемократското однесување, несоодветните закони и невладеењето на правото тоа го покажуваат“, вели Најчевска.
Најчевска додава дека во Македонија Бугарите не се доживуваат како најголем непријател.
„Во Македонија Бугарите не се доживуваат како најголем непријател. Има нешто пострашно, а тоа е што сè уште постои пежоративен однос кон Бугарија, уште од времето кога беше дел од советската структура и привезок на Советскиот Сојуз. Мислам дека од тогаш постои омаловажувачко однесување кон Бугарите.
Сметам дека воопшто не смее ни да се постави прашањето дали ќе ги внесеме или не во Уставот. Ние одамна направивме грешка уште при структуирањето на првиот Устав, со тоа што не го поставивме на граѓанска основа, туку како некаков хибрид меѓу новата граѓанска демократија и заштитата на колективните права од социјалистичка Македонија и социјалистичка Југославија.
Јас лично не сум за внесување, туку сум прашањето за внесување да се постави пред Собранието. Ако има гласови – да се внесат, ако нема – да не се внесат и да се истапи пред ЕУ дека сме го направиле своето, а граѓаните се спротивставиле“, вели Најчевска.
Како потсетување, Никола Димитров предупреди дека прашањето со Бугарија сè уште не е решено и дека последиците од актуелните политики се веќе видливи. Тој изјави дека Бугарија на сите анкети во Македонија е најголем непријател.
