Споменот за Тоше Проески добива ново музичко издание. Дискографската куќа „Хит рекордс“ во чест на македонскиот пејач ја објави двојната винилна плоча „Најдоброто од Тоше Проески“, која содржи 16 песни.
Изданието е особено значајно за композиторот Мирослав Рус, главен уредник на „Хит рекордс“, кој со Тоше имал блиско пријателство, но и авторска соработка.
Рус посочува дека работата на вакво издание за него претставува и чест и обврска, со оглед на односот што го имал со Тоше и значењето на неговото творештво.
„Не можам да замислам делото на Тоше Проески да остане без албум кој, во презентативна смисла, е вистинска, сериозна трага на еден уметник без граници каков што беше Тоше Проески“, вели Рус.
На двојната плоча се наоѓаат песни чии автори се Миро Буљан, Антонија Шола, Леонтина Вукомановиќ, Ѓорѓе Новковиќ, Марина Туцаковиќ и други.
Посебно внимание е посветено и на изгледот на изданието. Дизајнот е дело на Игор Келчец, а на предната и задната страна се наоѓаат портрети на Тоше.
Во внатрешноста на плочата е сместен колаж од приватни и професионални фотографии, кои опфаќаат различни периоди од неговиот живот и кариера.
Со ова издание, дел од најпознатото музичко наследство на Тоше Проески добива и винилна форма, како траен спомен на неговото творештво.
