Работата на најголемата руска рафинерија за нафта во Омск е прекината по украинскиот напад со дронови, потврдија за „Ројтерс“ два извора од нафтената индустрија.
Нападот, извршен длабоко во Сибир, е еден од украинските удари со најголем дострел од почетокот на војната и може дополнително да го влоши недостигот на гориво во Русија.
Пратеникот на рускиот претседател Владимир Путин за Сибир, Анатолиј Серишев, изјави дека објектите на рафинеријата се оштетени, но дека нема повредени меѓу вработените.
„Во тек е проценка на штетата, а надлежните служби работат на санација на последиците“, изјави Серишев.
Според извори од индустријата, во нападот била оштетена и запалена главната дестилациска единица за преработка на сурова нафта, која сочинува околу 38 проценти од производствениот капацитет на рафинеријата.
Дополнително, денеска рафинеријата ја прекинала продажбата на бензин и дизел на берзата во Санкт Петербург.
Изворите наведуваат дека е запрена и работата на уште една преработувачка единица поради оштетување на клучната инфраструктура, иако таа не била директно погодена во нападот.
Рафинеријата во Омск во 2024 година преработила околу 22 милиони тони сурова нафта, произведувајќи околу пет милиони тони бензин и осум милиони тони дизел.
