Украински автор кој живее во киевската населба Лукјанивка, една од најпогодените од руските ракетни напади од почетокот на војната, опиша како изгледа секојдневието под постојани воздушни тревоги и експлозии.
Тој наведува дека жителите на населбата со горчлив хумор велат дека „сè што не лета кон нас, лета покрај нас“, додавајќи дека децата веќе научиле по звук да ги разликуваат различните типови руски беспилотни летала и ракети.
„Кога за само 40 минути во ваша близина ќе паднат десетици ракети, сè изгледа како земјотрес. Физички чувствувате како зградата се тресе од експлозиите“, пишува тој, посочувајќи дека во последниот напад биле оштетени повеќе објекти, меѓу кои и киното „Киевска Рус“, каде што како дете гледал филмови.
И покрај нападите, животот во градот продолжува. На пазарите се продава овошје и зеленчук, комуналните служби ги расчистуваат урнатините, а дел од граѓаните продолжуваат со секојдневните активности.
Авторот ја пренесува и објавата на амбасадорката на Европската Унија во Украина, Катарина Матернова, која наведува дека дел од ноќта ја поминала во засолниште, додека експлозии одекнувале низ Киев.
Таа истакнува дека нападите погодиле станбени згради, супермаркет, деловни објекти и автомобили, при што, според првичните информации, загинало едно лице, а најмалку 15 биле повредени.
Авторот смета дека масовните руски напади врз Киев не се спонтана одмазда, туку дел од, како што наведува, долгорочна стратегија за уништување на украинската инфраструктура и создавање чувство дека во главниот град нема безбедно место за живеење.
Тој оценува дека доколку Русија ги прекине нападите, војната би можела да заврши, додека прекинот на украинскиот отпор би значел, како што наведува, крај на Украина.
