Граѓани поднесоа колективна тужба против американската компанија за спортска опрема „Најк“, обвинувајќи ја за злоупотреби поврзани со царинските трошоци што, според нив, биле префрлени врз купувачите преку повисоки цени на производите.
Тужбата е поднесена пред Федералниот суд во Портланд.
Купувачите тврдат дека „Најк“ неоправдано ги зголемил цените на одредени модели патики за пет до десет долари, а цените на облеката за два до десет долари, со образложение дека така ги покрива трошоците од царините.
„Најк“ не дал никаква правно обврзувачка гаранција дека ќе им ги врати на потрошувачите дополнително наплатените средства, кои ги оправдувал со повисоки царини“, се наведува во тужбата.
Според подносителите, доколку судот не реагира, компанијата би можела истите трошоци да ги наплати двапати – еднаш од потрошувачите преку повисоки цени, а вторпат од федералната влада преку поврат на царините.
Во тужбата се посочува дека „Најк“ не треба да ги задржи средствата добиени преку поскапувањето, бидејќи Врховниот суд на САД во февруари ги поништил царините што ги воведе американскиот претседател Доналд Трамп.
Според информациите во случајот, „Најк“ платил дополнителни една милијарда долари царини за увезена стока како последица од мерките воведени од администрацијата на Трамп.
