Најмалку 12 загинати во руски напади врз Украина: Погодени Киев, Одеса, Харков и други градови

Најмалку 12 лица загинале, а десетици се повредени во серијата руски ракетни и дронски напади врз повеќе украински градови, соопшти украинскиот претседател Володимир Зеленски.

— реклама —

Во Киев, при ракетен напад врз железничко депо, според официјалните информации, загинале седум лица. На местото избувнале пожари и е причинета голема материјална штета. Директорот на украинската железница Олександр Перцовскиј информираше дека десетици железнички работници успеале да се засолнат и да останат безбедни.

Уште три лица загинале во Бориспил, каде што бил извршен тежок воздушен напад со ракети и беспилотни летала.

— реклама —

Зеленски по ноќните напади соопшти дека биле погодени и Одеса, Харков, Запорожје, Херсон и други градови низ Украина, при што има десетици повредени.

— реклама —

Од руското Министерство за одбрана соопштија дека руските сили извршиле „масовен напад“ со оружје со долг дострел и беспилотни летала. Според руската страна, цел биле воено-индустриски објекти, како и објекти поврзани со снабдувањето со гориво и енергија во Киев и околниот регион.

Русија извести и за напади врз инфраструктурата во регионот Одеса, како и врз пристаништата Одеса и Чорноморск.

Во меѓувреме, министрите за одбрана на земјите членки на Европската Унија денеска во Виклоу, Ирска, треба да разговараат за продолжување на поддршката за Украина, вклучително и за соработката со украинската одбранбена индустрија.