Најмалку четири лица загинаа, а 35 деца се повредени во ноќешен напад со дрон врз студентски дом во Луганската област, која е под руска контрола, соопштија руски претставници.
Нападот се случил во градот Старобилск на истокот од Украина, пренесува Reuters.
Агенцијата наведува дека не можела независно да ги потврди тврдењата, а од украинска страна засега нема официјален коментар.
Луганската област е една од четирите украински региони што Русија ги анектираше во 2022 година, потег што Украина и голем дел од меѓународната заедница го сметаат за нелегално преземање територија.
Руската комесарка за човекови права Јана Лантратова изјави дека во домот на колеџот во Старобилск, кој работи во рамките на Луганскиот педагошки универзитет, во моментот на нападот спиеле 86 тинејџери на возраст од 14 до 18 години.
„Вооружените сили на Украина извршија целен напад врз деца кои спиеле“, наведе Лантратова во соопштение.
Леонид Пасечник, лидерот на Луганската област поставен од Москва, изјави дека две лица биле извлечени од под урнатините и дека спасувачките екипи продолжуваат да трагаат по деца кои останале заробени под остатоците од зградата.
На фотографиите и видеоснимките што ги објавија руските власти се гледаат спасувачи како на носилки извлекуваат повреден маж од урнатините. Прикажани се и тешко оштетени објекти, од кои еден делумно се урнал, како и пожари што сè уште горат на местото на нападот.
