Најмалку две лица загинаа во новите украински напади врз анектираниот полуостров Крим, соопштија локалните власти поставени од Москва.
Претседателот на Крим, поставен од руските власти, Сергеј Аксјонов, изјави дека меѓу жртвите има и малолетно лице. Според него, уште две лица се повредени во нападот што се случил во близина на Симферопол.
Жртви се пријавени и во руската Брјанска област. Вршителот на должноста гувернер, Егор Ковалчук, соопшти дека украински дрон погодил автомобил во близина на селото Солова, при што загинале 23-годишен возач и неговиот 15-годишен сопатник.
Украинските напади со беспилотни летала предизвикале пожари и во јужниот руски Краснодарски крај. Според локалните власти, по пад на остатоци од дрон избувнал пожар во складиште за нафта во Полтавскаја, објект кој бил погоден и минатата седмица.
Пожар избувнал и во фабрички комплекс во Абинскиот реон, исто така како последица од остатоци од соборен дрон.
Украинскиот претседател Володимир Зеленски го потврди нападот врз складиштето за нафта, додавајќи дека биле погодени и две рафинерии во Уфа, во руската Република Башкортостан.
Од друга страна, шефот на Башкортостан, Радиј Хабиров, соопшти дека нападот врз Уфа бил одбиен и дека нема повредени, а индустриските капацитети продолжуваат да работат нормално.
Руското Министерство за одбрана соопшти дека во текот на ноќта биле пресретнати вкупно 269 украински беспилотни летала над руска територија и над анектираниот Крим.
Во обид да ја ослаби руската воена машинерија, Украина во последниот период ги интензивира нападите врз руската енергетска инфраструктура и воени објекти, со цел да ги наруши испораките на гориво за армијата и да ги намали приходите на Москва од енергетскиот сектор.
