Најмалку три лица загинаа во денешните руски напади врз цели во Украина, додека украинските сили продолжија со напади врз руска инфраструктура.
Во руски напад со дронови врз северот на Украина загинале 29-годишна жена и нејзиниот деветгодишен син, соопштија украинските власти. Во нападот во регионот Суми биле повредени уште четири лица, кои поради тешки изгореници се хоспитализирани.
Во источната област Доњецк, пак, руски напад оштетил шест ката од станбена зграда. Загинало едно лице, а 16 биле повредени, изјави украинскиот претседател Володимир Зеленски.
На мета на нападот била и железничката станица во украинското пристаниште Измаил, која, според украинските власти, се користи за транспорт на воен товар и гориво за украинските вооружени сили. Зеленски изјави дека руските сили во текот на ноќта нападнале вкупно 12 украински региони.
Од друга страна, руското Министерство за одбрана соопшти дека руските сили во Црното Море погодиле два влекачи кои ги придружувале товарните бродови со западно вооружување наменето за Украина.
Украинските сили во меѓувреме продолжија со нападите врз руската инфраструктура. Погодено било пристаништето Уст-Луга во Ленинградската област, северозападно од Москва, при што избувнал пожар, изјави регионалниот гувернер Александар Дрозденко.
Уст-Луга е еден од најголемите руски терминали за извоз на нафта и гас и се наоѓа на повеќе од 800 километри од Украина.
Украина извршила и уште еден напад врз објекти на компанијата „Вајлдберис“, најголемиот руски интернет-продавач, за која Киев тврди дека помага во снабдувањето на руската армија.
