Во изминатите 24 часа најмногу врнежи се измерени во Крушево, каде наврнале 16 литри дожд на квадратен метар, соопшти Управата за хидрометеоролошки работи (УХМР).
Следува Ѓуриште со 14 литри на квадратен метар, додека во Прилеп се измерени 11 литри.
Помали количества дожд се регистрирани во Берово – 2 литри, а во Битола и на мерното место Скопје-Петровец – по 1 литар на квадратен метар.
Од УХМР напоменуваат дека измерените вредности се однесуваат на дождомерните места и дека поради локалниот карактер на врнежите, количината на паднат воден талог може значително да варира, па на одредени места може да биде и многу поголема.
Денеска времето ќе биде променливо облачно и топло со сончеви периоди. Во попладневните часови се очекуваат повремени локални врнежи од дожд, а наместа нестабилност со пороен дожд, грмежи и засилен ветер.
Максималната температура ќе се движи од 25 до 33 степени.
Во Скопје ќе биде променливо облачно и топло со сончеви периоди и слаб ветер од јужен правец. Попладне во делови од котлината се очекуваат повремени врнежи и услови за нестабилност со пороен дожд, грмежи и засилен ветер. Максималната температура ќе достигне 32 степени.
