Кина забрзано инвестира во развој на роботски раце со човечка прецизност, а технолошките компании веруваат дека токму ова ќе биде клучниот чекор за создавање навистина функционални хуманоидни роботи.
Иако роботите денес можат да извршуваат бројни задачи, изработката на рака што ќе ги повторува сложените движења на човекот и натаму претставува еден од најголемите инженерски предизвици. Благодарение на напредокот на вештачката интелигенција и силната индустриска база, кинеските компании сметаат дека се блиску до решавање на овој проблем.
Владата во Пекинг роботиката ја смета за една од клучните технологии за идниот економски развој, особено поради стареењето на населението и недостигот од работна сила. Во земјата веќе работат повеќе од милион компании поврзани со роботика, а нивниот број постојано расте.
Основачот на компанијата LinkerBot, Жоу Јонг, вели дека изработката на роботска рака е многу покомплицирана од развојот на цел хуманоиден робот.
„Роботската рака е десетпати посложена од остатокот од телото, иако зафаќа само мал дел од неговата големина“, истакнува Жоу.
Неговата компанија моментално произведува околу 5.000 роботски раце месечно и планира двојно да го зголеми производството. Покрај индустриската примена, една од целите е и развој на поевтини бионички протези, чија цена би можела да се намали на околу 1.000 долари.
Предноста на кинеските компании е развиениот синџир на снабдување, кој овозможува брзо производство на компоненти како батерии, минијатурни електромотори и сензори. Сепак, експертите сметаат дека најголемиот предизвик не е хардверот, туку софтверот што треба да ги научи роботите самостојно да извршуваат сложени задачи.
За таа цел, компаниите користат специјални сензорски ракавици кои ги снимаат движењата, притисокот и допирот при секојдневните активности на луѓето. Собраните податоци потоа се користат за обука на модели на вештачка интелигенција, со цел роботските раце да станат што попрецизни и поспособни.
Според инженерите, крајната цел не е роботите да ја заменат човечката работна сила, туку да станат помошници во домовите, фабриките и здравствениот сектор, извршувајќи задачи што денес бараат висока прецизност и умешност.
