Поради сè помалите резерви на скапи противвоздушни ракети, Украина во одбраната од руските напади сè повеќе се потпира на домашниот систем за електронско војување „Лима“, кој служи за попречување и пренасочување на руските дронови и ракети.
Наместо класично соборување на заканите, системот функционира така што ги попречува и лажно ги насочува сигналите за сателитска навигација, поради што руското оружје скршнува од зададената траекторија.
Еден од развивачите на системот, познат под кодното име „Алхемичар“, објаснил дека „Лима“ создава силни полиња за електронско попречување, кои го прекинуваат сателитското наведување на проектилите и дроновите.
„Кога е активирана Лима, отстапувањето на проектилите е уште поголемо. Освен што ја блокираме навигацијата, користиме и лажирање и замена на координатите за неколку километри. Можеме да ги натераме ракетите да паднат во полиња наместо да ги погодат целите“, изјавил тој.
Системот, развиен од украинскиот одбранбен стартап Cascade Systems, станал клучен дел од украинската противвоздушна одбрана во период кога Русија ги засилува нападите со далекуметно оружје, а Киев се соочува со недостиг од пресретнувачки ракети.
Според компанијата, секоја единица „Лима“ чини до три милиони гривни, односно околу 58 илјади евра, зависно од верзијата. За заштита на голем град потребни се меѓу 30 и 100 единици, што чини околу пет милиони евра – приближно колку една ракета „Патриот PAC-3“.
Досега се испорачани повеќе од 400 системи „Лима“. Украинската армија почнала да ги користи во јули 2024 година, а од октомври 2025 година нивната употреба била проширена и за заштита на цивилната инфраструктура.
Според податоците на компанијата, во последните 18 месеци системите „Лима“ попречиле повеќе од 20.500 дронови „Шахед“ и пренасочиле десетици балистички и крстосувачки ракети.
Украинските воени претставници велат дека најновите верзии на системот можат да попречуваат и далекуметно оружје кое се потпира на рускиот сателитски навигациски систем ГЛОНАСС.
Сепак, таканаречените „лизгачки бомби“ се потешки за неутрализирање, бидејќи најчесто се користат во близина на фронтот, каде што Украина не може лесно да создава „мртви зони“ за сигнал.
Во меѓувреме, руските сили вовеле нови антени отпорни на попречување, познати како „Комета“, поради што украинските инженери морале да развијат нова верзија наречена „Лима Квант“.
„Тогаш започна вистинскиот живот. Живеевме во лабораторијата, обидувајќи се да ги пробиеме новите руски антени“, изјавил „Алхемичар“.
Тој додава дека војната со електронско попречување е постојана технолошка трка во која двете страни непрекинато ги подобруваат своите системи и тактики.
