Товарен брод бил нападнат денеска во Црвеното Море, во близина на јеменскиот пристанишен град Ал Худаида, соопшти британскиот Центар за поморски трговски операции (УКМТО).
Според првичните информации, екипажот испратил повик за помош, наведувајќи дека бродот бил нападнат од „непознати вооружени напаѓачи“.
Од УКМТО информираа дека е започната истрага за инцидентот, а воедно упатија предупредување до сите пловни објекти што минуваат низ ова подрачје да бидат особено внимателни и веднаш да пријават каква било сомнителна активност.
Засега ниту една група не ја презеде одговорноста за нападот.
Нападите врз трговски бродови во Црвеното Море започнаа во 2023 година, кога јеменските бунтовници Хути изведоа серија акции против пловни објекти во регионот. Во меѓувреме тие напади беа прекинати, а Соединетите Американски Држави ги прогласија Хутите за терористичка организација.
