Народната банка спровела четири нивоа проверки пред давањето согласност за преземањето на Стопанска банка АД Битола од страна на Алта банка од Србија, тврди Славески

АЛТА банка АД Битола има висока капитализираност и ликвидност, а воведената администрација од Народната банка е мерка за заштита на банката, изјави гувернерот Трајко Славески на денешната надзорна расправа.

— реклама —

Славески одговараше на прашањата на петмина пратеници: Сања Лукаревска од СДСМ, Ели Панова од ВМРО-ДПМНЕ, Сашко Јанчев од Левица, Фериде Хаџиу од ВЛЕН и Павле Арсовски од ЗНАМ.

Тој објасни дека Народната банка ги спровела сите законски предвидени постапки пред давање согласност за преземањето на акциите на Стопанска банка АД Битола од страна на АЛТА банка од Србија. За проверките бил искористен максималниот законски рок од три месеци, а во процесот биле вклучени четири нивоа во рамките на Народната банка.

— реклама —

Според Славески, врз основа на официјалната документација биле проверени идентитетот на барателот, сопственичката структура и крајниот сопственик. Била остварена и службена комуникација со надлежни домашни и странски институции, судови и органи за финансиско разузнавање. Биле проверени и евентуалните невообичаени трансакции, при што, како што рече гувернерот, не биле утврдени пречки за давање согласност.

— реклама —

Осврнувајќи се на санкцијата што ја изрекол австрискиот регулатор за АЛТА банка од Србија, Славески појасни дека станува збор за прекршочна санкција, која не подразбира забрана за вршење дејност и, според нашето законодавство, не претставува пречка за купување акции.

Во врска со укажувањата од Народната банка на Србија, гувернерот рече дека од српскиот регулатор добиле мислење за работењето на АЛТА банка, во кое не била изразена загриженост за нејзината работа или околности што би предизвикале сомнеж кај Народната банка на Македонија.

— реклама —

Славески додаде дека трансакциите на АЛТА банка со Србија се поврзани со редовното работење на нејзините клиенти.