Насилството не стивнува: Напади врз членови на семејството, физички пресметки меѓу малолетници и употреба на метални предмети

Повеќе случаи на физичко насилство и напади врз граѓани и полициски службеници биле пријавени во изминатиот период во Берово, Струга, Кичево, Куманово, Тетово и Скопје, информира Министерството за внатрешни работи.

— реклама —

Во Берово, 43-годишна жена пријавила дека на 3 ноември, по претходна расправија, била физички нападната во семејниот дом од нејзиниот сопруг. Истиот ден, во струшко село, било пријавено дека маж физички го нападнал својот 67-годишен татко. Во кичевско село, пак, полицијата го лишила од слобода 59-годишниот Ц. А., осомничен дека ја нападнал сопругата во семејниот дом.

Кривична пријава е поднесена и против 62-годишниот З. Ц. од Младо Нагоричане, кој се сомничи дека во август физички го нападнал 48-годишниот М. С. од Куманово и му нанел тешка телесна повреда.

— реклама —

Во Тетово, кривична пријава е поднесена против 61-годишен жител на Тетовско, осомничен дека пред угостителски објект физички нападнал жена од Гостиварско. Во друг случај, двајца жители на селото Теново се пријавени за насилство врз жител на истото село. Според МВР, при нападот во септември бил употребен и метален предмет.

— реклама —

Кривична пријава за напад врз службено лице е поднесена против 27-годишен жител на Арачиново. Според пријавата, на 29 септември во селото Отља, тој не застанал на полициски знак, со товарно возило удрил во службено возило на МВР, а потоа физички нападнал полициски службеници.

Најнов случај е регистриран во скопската населба Драчево, каде што на 3 ноември полицијата го лишила од слобода 27-годишниот А. М. од Скопје. Тој бил пријавен дека во автобус физички нападнал неколку патници и возачот, од кого се обидел да го одземе и мобилниот телефон. Потоа излегол од автобусот и оштетил патничко возило, а по пристигнувањето на полицијата нападнал и полициски службеници.

— реклама —

Од МВР информираат дека за случаите се преземаат мерки, а по целосно документирање ќе следуваат соодветни пријави.